Элӗк районӗн администрацийӗн пуҫлӑхӗ Александр Куликов шанчӑкран тухнине, ӑна прокуратура ӗҫрен кӑларса ярасшӑннине Чӑваш халӑх сайчӗ кӑҫалхи ҫӗртме уйӑхӗнче пӗлтернӗччӗ-ха.
Аса илтерер: Элӗк районӗн прокуратури Элӗк районӗн администрацийӗнче автоҫулсене тытса тӑрассипе тата юсассипе контракт алӑ пуснӑ чухне коррупципе ҫыхӑннӑ саккуна пӑснине тупса палӑртнӑ.
Элӗк районӗн администрацийӗ райадминистраци пуҫлӑхӗн арӑмӗн уйрӑм усламҫӑ пулса тӑрӑшакан ывӑлӗпе 2019-2021 ҫулсенче 42 миллион ытла тенкӗлӗх муниципалитет килӗшӗвне алӑ пуснӑ. Ҫавӑн чухне тӳре-шара коррупципе ҫыхӑннӑ саккуна нормисене шута илмен.
Районти депутатсен пухӑвӗ прокуратура ыйтнине пурнӑҫлама васкаман. Кӑҫалхи ака уйӑхӗнче пуҫлӑха выговор панипех ҫырлахнӑ. Анчах надзор органӗ кунпа лӑпланман, вырӑнти суда тавӑҫпа тухнӑ. Суд та прокуратурӑпа килӗшнӗ.
Унтан ӗҫ аппеляци мелӗпе Чӑваш Республикин Верховнӑй судне ҫитнӗ. Унтисем те Куликова ӗҫрен кӑлармалла тесе йышӑннӑ.
Сӑмах май каласан, маларах Куликов ӗҫлеме пӑрахнӑ-пӑрахнах.
Чӑваш Республикин обязательнӑй медицина страхованийӗн территорири фончӗн директорӗ пулма Максим Дроздова ҫирӗплетнӗ. Кӑҫалхи пуш уйӑхӗн 30-мӗшӗнчен тытӑнса авӑн уйӑхӗн 29-мӗшӗччен ӑна директор тивӗҫӗсене пурнӑҫлама шаннӑччӗ.
Ӗнер, авӑн уйӑхӗн 29-мӗшӗнче, республика ертӳҫин Олег Николаевӑн йышӑнӑвӗпе Максим Дроздова директор пуканне йышӑнтарнӑ.
Хӑй вӑхӑтӗнче Максим Дроздов Ҫӗнӗ Шупашкарти «Технологи центрӗ» тулли мар яваплӑ обществӑна ертсе пынӑ. Вӑл «Тимӗр шӑратакан завод», «Литпромгрупп» организацисен учредителӗ, «Промлитснаб» предприяти ертӳҫи пулнӑ.
Чӑваш Енри студентсене оборонӑпа промышленность предприятийӗсенче ӗҫлеттересшӗн. Ку ыйтӑва ӗнер республика Правительствинче иртнӗ ларура сӳтсе явнӑ. Унта оборонӑпа промышленность комплексӗн организацийӗсенче кадр ыйтӑвне татса парасси пирки калаҫнӑ.
Чӑваш Енӗн Промышленноҫпа энергетика министерствинче пӗлтернӗ тӑрӑх, асӑннӑ комплексӑн предприятийӗсенче производство калӑпӑшне ӳстермелле, ҫитес ҫул тӗлне — виҫӗ хут та.
Оборонӑпа промышленность комплексӗн 5 организацийӗнче авӑн уйӑхӗн пуҫламӑшӗ тӗлне 629 ҫын кирлӗ пулнӑ, 300-е яхӑн ҫынна ӗҫе вырнаҫтарнӑ. Ӗҫе илес ыйтупа канмалли кунсенче те ӗҫлеҫҫӗ.
Чӑваш Ен Элтеперӗ Олег Николаев Чӑваш Енӗн Вӗренӳпе ҫамрӑксен политикин министерствине студентсене явӑҫтарасси пирки шухӑшласа пӑхма сӗннӗ. Ӗҫпе вӗренӗве йӗркеллӗ шайлаштарсан аван пулмалла тесе шухӑшлаҫҫӗ.
Айӑплава пурнӑҫлакан федераци сулужбин Чӑваш Енри управленийӗн ҫӗнӗ пуҫлӑх. Ку пукана Геннадий Шиндин йышӑннӑ.
Паян ҫӗнӗ пуҫлӑха ЧР Элтеперне видеоҫыхӑну урлӑ паллаштарнӑ. Геннадий Петрович 1976 ҫулта ҫуралнӑ, Рязаньти патшалӑх ял хуҫалӑх академине пӗтернӗ, «ял хуҫалӑх производствин технологӗ» специальноҫе алла илнӗ. Унӑн ятарлӑ званийӗ – шалти службӑн полковникӗ. 2017 ҫултанпа айӑплава пурнӑҫлакан федераци службин Мӑкшӑ Республикинчи управленийӗн пуҫлӑхӗ пулнӑ. Паянтан – пирӗн республикӑри управлени ертӳҫи.
Унччен ку должноҫе Александр Робота йышӑннӑ пулнӑ. Халӗ вӑл – Саратов облаҫӗнчи управлени пуҫлӑхӗ.
«Шупашкар хулин граждан оборони тата чрезвычайлӑ лару-тӑру управленийӗ» муниципалитетӑн хысна учрежденине ертсе пыма Алексей Андреева шаннӑ. Унччен ҫав пукана Николай Немешкин йышӑннӑ.
Алексей Олегович чрезвычайлӑ лару-тӑруран асӑрханассипе тата ӑна сирсе ярассипе ӗҫлекен организацисенче 14 ҫул ытларах тӑрӑшнӑ. 2016 ҫултанпа вӑл малара эпир асӑннӑ управленире шыравпа ҫӑлав отрядне ертсе пынӑ.
Авӑн уйӑхӗн 26-мӗшӗнче Чӑваш Енӗн финанс министрӗн заместительне ӗҫрен кӑларнӑ. Правительствӑри ҫемҫе пукансӑр Павел Иванов юлнӑ.
Паянхи куна илсен, Чӑваш Ен финанс министрӗн Михаил Ноздряковӑн тӑватӑ заместитель: Ольга Метелева, Галина Павлова, Игорь Смирнов, Татьяна Щербаткина.
Павел Иванов Чӑваш Енӗн Финанс министерствинче 2020 ҫулхи нарӑс уйӑхӗнченпе ӗҫленӗ, министр ҫумӗ пулса вӑл маларах та — 2011-2012 ҫулсенче — тӑрӑшнӑ.
2019 ҫулхи утӑ уйӑхӗнче Павел Иванова экономика министрӗн тилхепине те тыттарнӑ, унччен вӑл пӗр вӑхӑт Перекет банкӗн тата Внешэкономбанк тытӑмӗсенче ӗҫленӗ.
Чӑваш Енри темиҫе ҫынна федераци судйи пулма ҫирӗплетнӗ. Ҫавна ӗнентерекен удостоверенисене вӗсене ӗнер панӑ. Документа Чӑваш Енри тӗп федераци инспекторӗ Григорий Сергеев савӑнӑҫлӑ лару-тӑрура тыттарнӑ.
Мероприятие Чӑваш Енӗн Верховнӑй сучӗн председателӗ Анатолий Петров, унӑн ҫумӗсем Галина Савелькина тата Марина Блинова, Чӑваш Енри Суд департаменчӗн управленийӗн пуҫлӑхӗн тивӗҫне пурнӑҫлакан Рената Макаричева хутшӑннӑ.
РФ Президенчӗн Владимир Путинӑн хушӑвӗпе федераци судйин удостоверенийӗсене Чӑваш Енӗн Верховнӑй сучӗн судйине Елена Никитинӑна, Шупашкар районӗнчи судӑн судйине Алина Лукинана, Шупашкарти Ленин районӗн сучӗн судйине Алексей Дмитриева панӑ.
Чӑваш Енре ҫитес виҫӗ ҫулта 3 пин ИТ-специалист ҫитмӗ. Ҫакӑн пек пӗтӗмлетнӗ республикӑн Цифра аталанӑвӗн, информаци политикин тата массӑллӑ коммуникацисен министерстви регионти пысӑк ИТ-компанисене явӑҫтарнӑ ыйтӑм тӑрӑх.
«Ку вӑл пысӑк цифра. Ҫавӑнпа та эпир ИТ-компанисемпе тата вӗренӳ заведенийӗсемпе пӗр шухӑшлӑ пулса кадрсене хатӗрлес ыйтупа ӗҫлеме палӑртатпӑр», — тенӗ ведомство ертӳҫи Кристина Майнина.
Шупашкарти икӗ вӑтам шкулта тата пӗр гимназире директорсем кирлӗ. Конкурс иртесси пирки Шупашкар хула администрацийӗн вӗренӳ управленийӗ пӗлтернӗ.
Директорсӑр юлнӑ вӗренӳ учрежденийӗсен йышӗнче — 18-мӗш тата 39-мӗш шкулсем, 4-мӗш гимнази. Пуҫлӑх тилхепине тытас кӑмӑллисен заявленийӗсене авӑн уйӑхӗн 21-мӗшӗччен йышӑнӗҫ, ҫӗнтерӳҫӗне юпа уйӑхӗн 4-мӗшӗнче палӑртӗҫ.
Директор пулас ӗмӗтлӗ кандидатсен «Патшалӑх тата муниципалитет управленийӗ», «Менеджмент», «Персонала ертсе пырасси» енсемпе аслӑ пӗлӳллӗ пулмалла, педагог пулса 5 ҫултан кая мар ӗҫлени кирлӗ. Конкурсра ҫӗнтернӗ кандидатсемпе ӗҫ килӗшӗвне 5 ҫуллӑха тӑвӗҫ.
Чӑваш Енре ҫутҫанталӑка хӳтӗлес енӗпе ҫӗнӗ прокурор ӗҫе кӳлӗннӗ. Шупашкарти районсем хушшинчи прокурор должноҫне юстицин кӗҫӗн советникне Николай Костенкӑна шаннӑ.
Николай Васильевич унччен Ивановӑри, Волгоградри районсем хушшинчи ҫутҫанталӑк прокурорӗн заместителӗнче тӑрӑшнӑ. Ҫавӑн пекех Атӑлҫи тӑрӑхӗнчи регионсем хушшинчи прокуратурӑра тӗрлӗ должноҫра тимленӗ.
+0.3 °C